ორსულობის IV თვე

ამ თვიდან თქვენ მეორე ტრიმესტრში შეაბიჯეთ. ორსულობის ყველაზე რთული პერიოდი უკანაა და ტოქსიკოზიც აღარ შეგაწუხებთ. ეს ორსულობის ყველაზე კომფორტული ტრიმესტრია.შესაძლოა ამ თვეში მისი პირველი მოძრაობები შეიგრძნოთ და ასევე დაადგინოთ თქვენი პატარას სქესი.

მე-13 კვირა: სიგრძე - 60-70 მმ., წონა - 23 გრამი

ნაყოფის ნაწლავები მუცლის ღრუში გადაინაცვლებს. იწყება შარდის წარმოქმნა, რომელსაც პატარა სანაყოფე წყლებში გამოჰყოფს. ვითარდება ძვლოვანი ქსოვილიც, რომელიც წარმოქმნის თავის ქალასა და კიდურების ძვლებს. ამ ასაკში პატარას საკუთარი ხელის პირში ჩადება და წოვა შეუძლია.

მე-14 კვირა: სიგრძე - 80-90 მმ., წონა - 40 გრამი

სასქესო ორგანოები ჩამოყალიბებულია. პატარას სახე და თვალები თითქმის ჩამოყალიბებულია. მისმა თვალებმა თავზე გვერდითი მდებარეობიდან წინ გადმოინაცვლა. ყურები კი თითქმის საბოლოო პოზიციაში დაფიქსირდა. მისი მკლავები უკვე საკმაოდ გრძელია, კისერი კი მკაფიოდ გამოკვეთილი. სისხლის წითელი უჯრედები უკვე ელენთაში წარმოიქმნება. ბავშვის სქესის დადგენა ულტრასონოგრაფიის მეშვეობით სავსებით შესაძლებელია, რადგან სასქესო ორგანოები უკვე ჩამოყალიბებულია. გოგონებს საკვერცხეები აქვთ, ბიჭებს კი პროსტატა. ნაყოფის თიროიდი წარმოქმნის ჰორმონებს. პატარა ყლაპავს და შეისუნთქავს სანაყოფე წყლებს.

მე-15 კვირა: სიგრძე - 90 - 100 მმ., წონა 70 გრამი

ვითარდება ჩონჩხი და ძვლები. სწრაფად იზრდება და თავზე უჩნდება თმები. ჩანასახს შეუძლია ხელის მტევანი მუშტად შეკრას. მისი თვალები და ყურები საბოლოო პოზიციაშია . ის ხშირად ასლოკინებს და ასე სწავლობს სუნთქვას.

მე-16 კვირა: სიგრძე 10 სმ., წონა - 100 გრამი

პატარა ინტენსიურად მოძრაობს და ასე ავარჯიშებს კუნთებს. შესაძლოა მისი მოძრაობა ჯერ-ჯერობით თქვენთვის შეუმჩნეველია, განსაკუთრებით თუ ეს თქვენი პირველი ორსულობაა. ის ასევე იცვლის სახის გამომეტყველებას და თამაშობს ჭიპლარით. მისი გულისცემა უკვე ჩვეულებრივი სტეტოსკოპითაც ისმინება. ნაყოფის მიმოქცევისა და გამოყოფის სისტემა უკვე სრულყოფილად ფუნქციონირებს.

მე-17 კვირა: სიგრძე - 11 სმ., წონა - 140 გრამი

ნაყოფი უკვე იწყებს კანის ქვეშ ცხიმების შეგროვებას. ცხიმი პატარას დაბადების შემდეგ ტემპერატურის შენარჩუნებაში დაეხმარება. მისი ჩონჩხი ჯერ-ჯერობით რეზინის მაგვარია, მაგრამ მომდევნო კვირების განმავლობაში გამაგრდება. ხერხემლის გარშემო არე იფარება დამცავი სუბსტანციით. სხეულის ზედაპირი იფარება საოფლე ჯირკვლებით. ნაყოფის ზრდასთან ერთად იზრდება და ვითარდება ჭიპლარი და პლაცენტაც, რათა თქვენი პატარას მზარდი მოთხოვნები დააკმაყოფილონ.