1 წლის და 9-10 თვის ბავშვი

ფოტო: მარიამ კაპანაძე, 1 წლის და 10 თვის;

გამოგვიგზავნეთ თქვენი შვილების ფოტოები მისამართზე: info@babyinfo.ge

მოძრაობა: პატარა ბევრს დარბის და უკეთესად მანევრირებს ავეჯსა და ნივთებს შორის. მისი უსაფრთხოება კვლავ მნიშვნელოვანია, რადგანაც მის მიერ ათვისებული ტერიტორია ახლა გაფართოვდა. ის ძვრება ავეჯზე, ცდილობს კარ-ფანჯრების გახსნას. ამიტომაც დამატებით იზრუნეთ მისი გარემოს უსაფრთხოებაზე. 

კვება: გახადეთ კვება უფრო სოციალური. ასადილეთ პატარა ოჯახის სხვა წევრებთან ერთად, ან დაუპატიჟეთ მეგობარი. ასე საკვები მისთვის უფრო საინტერესო გახდება. ეცადეთ თავადაც მიირთვათ რასაც ის ჭამს.

სიჯიუტის შემოტევები: ზრდასთან ერთად მისი დამოუკიდებლობა სულ უფრო თვალსაჩინო ხდება. მისი ხასიათი სულ უფრო რთულდება და საკუთარ ნება-სურვილსაც უკვე განსაკუთრებული სიმტკიცით გამოხატავს. ძალიან ხშირად ეს სადემონსტრაციო ჩვენებებია, მას შესაძლოა არც სურს ის რასაც ასე დაჟინებით ითხოვს, უბრალოდ ამოწმებს თავის საზღვრებს. ზოგჯერ შეძლებთ მის დამშვიდებას, ზოგჯერ კი სხვა რამეზე გადაუტანეთ ყურადღება. თუ ძილის დროსაც ჯიუტობს, თქვენ შეგიძლიათ ასეთ ხერხს მიმართოთ: დაუთმეთ უნიშვნელო დეტალი, მაგალითად თავად აარჩევინეთ, თუ რომელ პიჟამოს ჩაიცვამს ან რომელ ზღაპარს წაუკითხავთ, მაგრამ ნუ მისცემთ საშუალებას აირჩიოს და თავად გადაწყვიტოს დაიძინებს თუ არა. ის დამოუკიდებელ ადამიანად უნდა გაიზარდოს ამიტომ თავადვე წაახალისეთ მისი დამოუკიდებლობა, გაამხნევეთ და ყოველი შემთხვევისთვის აგრობინეთ, რომ თქვენ ახლოს ხართ. 

დღის განრიგის დაცვა მეტად აქტუალური ხდება. ეცადეთ, რომ ძილი და კვება დაცულ დროზე მოხდეს ყოველდღიურად. ეს ცხოვრების რითმის მოწესრიგებაში დაგეხმარებათ როგორც თქვენ თავად, ასევე პატარასაც გარკვეულ მოწესრიგებულ გარემოს შეუქმნის. ბავშვიც მშვიდად იქნება, რადგან ეცოდინება თუ რას უნდა ელოდოს დღის განმავლობაში.

შიშები: ამ პერიოდში შესაძლოა შენიშნოთ, რომ არარეალური და წარმოსახვითი საგნების და მოვლენების ეშინია, ან სავსებით რეალური საგნების და ადამიანების, მხოლოდ უსაფუძვლოდ. სერიოზულად მიიღეთ მისი შიშები და აგრძნობინეთ, რომ გესმით მისი. ეს შიშების დაძლევაში დაეხმარება.