1 წლის და 11 თვის - 2 წლის ბავშვი

ფოტო: სოფია ლაფერაშვილი, 1 წლის და 11 თვის

გამოგვიგზავნეთ თქვენი შვილების ფოტოები: info@babyinfo.ge;

მოძრაობა: პატარა თავისუფლად დადის და დარბის, კიბეზე ასვლისას კი ისევ სჭირდება თქვენი დახმარება ან სახელურის მოშველიება. ისევ ორივე ფეხს დგამს ერთ საფეხურზე და ჩამოსვლა ასვლაზე მეტად უჭირს. ამიტომ იყავით მის გვერდით როცა კიბეზე მოძრაობს და საჭიროებისამებრ გადაუკეტეთ კიბეებზე გასასვლელი, თუ თქვენი მეთვალყურეობის გარეშე მოუწევს დარჩენა. 

ამ ასაკის ბავშვი სავარაუდოდ საბავშვო საწოლიდანაც ადვილად ცოცდება. ამიტომაც 18 თვის შემდეგ დასაშვებია მისი დიდ საწოლში გადაყვანა. აქ კი ახალი საფრთხე ის არის, რომ დიდი საწოლიდან ადვილად გადმოვა და თავისუფლად შეძლებს ოთახში მოძრაობას. შეიძლება ძილში გადმოვარდეს კიდეც, ამიტომ დაუდეთ იატაკზე ბალიშები.

უკვე შეუძლია ტანსაცმლის დამოუკიდებლად გახდა, მაგრამ ჩაცმა უძნელდება. თუ ჩაცმა უყვარს, შეგიძლიათ თამაში შესთავაზოთ. მიეცით რამოდენიმე კოსტიუმი და ნება დართეთ თავად გამოიცვალოს ტანსაცმელი. 

წაახალისეთ მისი დამოუკიდებლად კვება.

თუ ხატვა უყვარს, აუცილებლად მიეცით ამის საშუალება. 

საუბარი: მას უკვე ექნება საყვარელი ზღაპარი ეყოლება ამოჩემებული ზღაპრის გმირიც. სიმღერებიც იცის. ხშირად მოაყოლეთ მისი საყვარელი ისტორიები და თავადაც ბევრი უკითხეთ. 

თქვენი პატარა სოციალურადაც ვითარდება. მართალია სათამაშოებს ჯერ ვერ უთმობს სხვა ბავშვებს, მაგრამ შეუძლია მათთან ერთად ერთ ადგილას თამაში. 

ქოთანი: პატარა 18 თვიდან 3 წლამდე შესაძლებელია რომ მიაჩვიოთ ქოთანს. ეს უფრო გაგიადვილდებათ, თუ ის თავად იჩენს ინტერესს ქოთნის მიმართ: აინტერესებს რას აკეთებთ ხოლმე თქვენ ტუალეტში და ასევე წუხდება სველი პამპერსით. მთავარი ნიშანი, რომ თქვენი პატარა ქოთნისთვის მზადაა, ის არის, რომ ბავშვი ხვდება, რომ მოშარდვა ან კუჭში გასვლა სჭირდება და ამას წინასწარ გატყობინებთ. თუ ასეა თამამად დაიწყეთ მისი ვარჯიში.